Chudaramma satulala lyrics in Telugu with meaning

చూడరమ్మ సతులాల – సాహిత్యం అర్థం:

పల్లవి: ఓ సతులాల,  తాను ముందుగా ధరించి తరువాత వేంకటేశ్వర స్వామి వారికి అదే మాలను సమర్పించే గోదాదేవి, తన భర్త అయిన వేంకటేశ్వర స్వామితో పెండ్లి పీటల మీద ఉన్నది, వారి పెండ్లి వైభవాన్ని తిలకించి పాటగా పాడండి.

కథ:

పురాణాల ప్రకారం, విష్ణుచితన్ అని పిలువబడే పెరియాళ్వార్, పెరుమాళ్ (విష్ణు) కి గొప్ప భక్తుడు. అతను ప్రతిరోజూ విష్ణుమూర్తికి పూలమాలను సమర్పించేవాడు. అతనికి సంతానం లేదు, పిల్లల కోసం ఆ స్వామివారిని ప్రార్థించేవాడు.

ఒకరోజు గుడిలోపల తోటలో తులసి మొక్క కింద ఒక అమ్మాయి కనిపించింది. ఈమెను విష్ణుచిత్తుల దంపతులు గోదాదేవిగా నామకరణం చేసి చాలా అల్లారుముద్దుగా పెంచుకోసాగారు. యుక్త వయస్సుకి వచ్చిన తరువాత గోదాదేవి, శ్రీవారు అయిన రంగనాథుడినే తన పతిగా పొందాలని తలచింది.

విష్ణుచిత్తులవారు ప్రతిరోజూ స్వామివారికి పూలమాలలను అలంకరణార్థమై తీసుకొని వెళ్ళేవారు, అయితే వాటిని గోదాదేవి ముందే ధరించి తరువాత స్వామివారికి పంపించసాగినది, ఓ రోజు ఈ రహస్యం తండ్రి అయిన విష్ణుచిత్తులవారికి తెలిసి చాలా దుఃఖించి స్వామివారికి మాలాధారణ కావించరు, దానితో స్వామి మొహం చిన్నబోతుంది, దీనికంతటికీ తన కుమార్తె తప్పిదమే కారణమని చాలా బాధపడుతుంటే స్వామివారు విష్ణుచిత్తులతో అదేమీ లేదనీ, అంతే కాకుండా ఇహ ప్రతిరోజూ తనకు గోదాదేవి ధరించిన మాలాధారణే కావాలని ఆదేశిస్తారు, దానితో విష్ణుచిత్తులవారు అలాగే చేస్తారు.

తరువాత గోదా అమ్మవారు, తన తోటి బాలికలతో కలిసి “తిరుప్పావు” వ్రతాచరణ చేస్తారు. ఆ తరువాత స్వామివారి ఆదేశానుసారం గోదాదేవికీ, రంగనాథస్వామి వారికీ వివాహం జరుగుతుంది, వివాహానంతరం గోదాదేవి ఆ చిద్విలాసునిలో లీనమవుతుంది, అది చూసి విష్ణుచిత్తులవారు దుఃఖితులయితే స్వామి విష్ణుచిత్తులకు జ్ఞానోపదేశంచేసి మాయ నుండి వెలుపలకి రావడానికి సాయం చేస్తారు. 

చరణం-1: ఓ సతులాల,  తాను ముందుగా ధరించి తరువాత వేంకటేశ్వర స్వామి వారికి అదే మాలను సమర్పించే కోమలమైన శరీరం కలిగిన ఈ గోదాదేవి,

సాక్షాత్తు లక్ష్మి దేవంట అలాంటప్పుడు ఆమె ఆభరణాలకు, అలంకారాలకు ఏమి తక్కువ? కామదేవుడైన మన్మథుడికి జనని ఆమె అందానికి ఏమి తక్కువ? చంద్రునితో పాటు పుట్టిన ఆవిడ ముఖంలోని కాంతికి ఏమి తక్కువ?

కథ-1:

మన్మథునికి, శివునికి గల సంబంధం వివరించే కథలు మత్స్య పురాణము, శివ పురాణములలో తెలుపబడినవి.

ఇంద్రుడు, ఇతర దేవతలను తారకాసురుడు బాధించసాగెను. బ్రహ్మ ఇచ్చిన వరాల మూలంగా శివుని కుమారుడు తప్ప అతన్ని మరెవ్వరూ వధించలేరు. అప్పటికి శివుడు బ్రహ్మచారిగా తపస్సు చేసుకొనుచున్నాడు. పార్వతి, శివుడి బ్రహ్మచర్యాన్ని భంగపరచి వివాహం చేసుకొంటే వారి పుత్రుడు తారకాసురున్ని వధిస్తాడని బ్రహ్మ సలహా ఇస్తాడు.

ఇంద్రుడు ఈ బృహత్కార్యాన్ని మన్మథుడు చేయగలడని పంపిస్తాడు. మన్మథుడు వసంతుని సహాయంతో శివున్ని పూల బాణంతో మేల్కొలుపుతాడు. కోపించిన శివుడు మూడవకన్ను తెరిచి మన్మథుడిని భస్మం చేస్తాడు.

మత్స్య పురాణం మరియు భాగవత పురాణాలలో కృష్ణుడు మరియు మన్మథుడి మధ్య సంబంధాన్ని ప్రస్తావించడం జరిగింది. శివునిచే బూడిద చేయబడిన తరువాత మన్మథుడు కృష్ణుని భార్య రుక్మిణి గర్భంలో ప్రద్యుమ్నగా పునర్జన్మ పొందాడు.

కథ-2:

రాక్షసుల బాధ పడలేక దేవతలు శివుడిని, బ్రహ్మను వెంట బెట్టుకొని శ్రీ మహావిష్ణువు వద్దకు వెళ్ళి వారి బాధలను చెప్పుకొంటారు.

అప్పుడు మహావిష్ణువు వారి మొర ఆలకించి “ఇప్పుడు రాక్షసులు బలంగా ఉన్న కారణం చేత వారితో సఖ్యంగా ఉండండి. వారితో సఖ్యంగా ఉండి క్షీరసాగర మథనం (పాల సముద్రం చిలకండి) జరపండి” అని చెబుతాడు. “ఆ మథనానికి కవ్వంగా మందరగిరిని వాడండి. త్రాడుగా వాసుకిని వినియోగించండి. ఆ మథన సమయంలో అమృతం పుడుతుంది. దానిని మీరు ఆరగించి, బాధలను వారికి మిగల్చండి” అని విష్ణువు సెలవిస్తాడు.

మథనం జరుపుతుండగా హాలాహలం, అమృతం, కామధేనువు, ఉచ్చైశ్రవము, ఐరావతం, కల్పవృక్షము, అప్సరసలు మొదలగు వాటితో పాటు చంద్రుడు, మహాలక్ష్మి కూడా పుడతారు.

అందువలనే అన్నమాచార్యుల వారు వారిరువురిని తోబుట్టువులుగా ఈ చరణంలో, మహాలక్ష్మిని పాల సముద్రానికి కూతురిగా రెండవ చరణంలో, అమృతానికి చుట్టముగా మూడవ చరణంలో చెప్పారు. 

చరణం-2: ఓ సతులాల, తాను ముందుగా ధరించి తరువాత వేంకటేశ్వర స్వామి వారికి అదే మాలను సమర్పించే ఆమె శ్రేష్ఠతతో సమానంగా ఎవరూ లేరు. శ్రేష్ఠతను అధిగమించిన ఈ గోదాదేవి,

పాలసముద్రానికి కుమార్తె అలాంటప్పుడు ఆమె గంభీరాలకు ఏమి తక్కువ? ఈ లోకమంతటికి మాతృమూర్తెన ఆమెకి దయ జాలి ఏమి తక్కువ? తామర పువ్వు మీద ఉండే ఆవిడ, మృదు స్వభావానికి ఏమి తక్కువ?

చరణం-3: ఓ సతులాల, తాను ముందుగా ధరించి తరువాత వేంకటేశ్వర స్వామి వారికి అదే మాలను సమర్పించే యుక్త వయస్సులో అందంగా ఉన్న ఈ గోదాదేవి,
దేవతల చేత నమస్కరించబడేది, అలాంటప్పుడు ఆమె గొప్పదనాలకు ఏమి తక్కువ? అమృతానికి బంధువు, ఆమె సంతోషానికి ఏమి తక్కువ? ఇన్ని సుగుణాలను, గొప్పదనాలను కలిగిన శ్రీ మహాలక్ష్మిని వలచి, శ్రీ వేంకటేశ్వర స్వామి తనకు తానుగా వచ్చి పెళ్లి చేసుకున్నాడు.